عمرو ادهم: الزمالك لا يستطيع التعاقد مع بن شرقي
الاستاذ عمرو ادهم طلع اتكلم امبارح عن طلبات بن شرقي للراتب الخاص بيه وقال انه طالب 1,5 مليون دولار وقال في اعتقاده ان المبلغ دا هيكون كبير واننا ممكن نجيب اجانب بأسعار اقل من كدا
عايز بس اقول لاستاذ عمرو ان تجربة الاجانب الاقل في السعر عشان نحاول نطلع بروفايل مقارب لاشرف بن شرقي اثبتت فشلها كتير وعندنا امثلة زي نداي وسامسون بندفعلهم تقريبا قد اللي طالبه بن شرقي بس مخدناش منهم 1% من مستوى واداء بن شرقي في الملعب
ف مع احترامي لرأي استاذ عمرو احنا مش محتاجين الكم قد ما محتاجين الكيف يعني لو روحنا جبنا اتنين من نوعية سامسون ونداي بنفس المبلغ فالافضل اننا نجيب لاعب واحد زي بن شرقي ياخد هو راتب الاتنين افضل مليون مرة من ثنائي مش هيقدم حاجة للفريق ومستنين منهم التطور
وميركاتوا الشتاء دليل على الكلام دا في لاعيبة جبناها خدت مرتبات مستفدناش منهم بأي شيء زي ياسر حمدي ومهاب ياسر وسيف جعفر وموتيابا اللي لسه معملش حاجة مع الفرقة وحتى عاطف اللي مبيشاركش من فترة كبيرة وكل دول بياخدوا مرتبات لو جبنا لاعب class A عارفين مستواه افضل منهم كلهم عشان كدا المبلغ دا طبيعي للاعب زي اشرف بن شرقي
انت هتجيب لاعب مش مجرد اسم في الاسكواد دا لاعب هيعلي من الاسكواد بتاعك ... لاعب قادر يرجع ثقة الفريق ككل لانه من اللاعيبة اللي بتمتلك ثقه كبيرة في نفسها وفي امكاناتها ودا اللاعب المطلوب اللي الزمالك محتاجة الفترة القادمة عشان يحاول يجاري فرقتين زي الاهلي وبيراميدز بيصرفوا ملايين الدولارات حاليا على لاعيبة تقيله واسماء كبيرة
اشرف بن شرقي لاعب كبير سواء على مستوى الاندية او المنتخبات وبيمتلك مقومات النجاح وقادر يغير من شكل واداء الفرقة ككل مع زيزو وعبدالله وناصر وشحاتة واحمد حمدي بعد عودتة ان شاء الله مع مهاجم قوي هداف افضل من اننا نجيب 3 اجانب نجربهم مش بنفس مستوى وكفاءة بن شرقي واحنا داخلين على سوبر قدام الاهلي اللي بيمتلك فرقتين اساسي واحتياطي مستواهم متقارب
واللاعب دا لعب ماتشات قمة كتير وديما كعبه عالي على لاعبي المنافس وبيدي الثقة للفرقة داخل الملعب وقادر يرجح كفة الزمالك في مباريات كتير مهمة الموسم القادم اللي الزمالك هيشارك فيه في اكتر من بطولة ومحتاجين اسكواد يقدر ينافس عليهم
ومع احترامي لحضراتكم على معلول الظهير الايمن للاهلي بياخد اكتر من المبلغ دا وموديست اللي مقدمش حاجة مع الاهلي كان بياخد راتب حوالي مليون و700 الف دولار في الموسم اللاعب اللي زي اشرف بن شرقي يستحق يندفع فيه راتب زي دا وهو من يستحق ارتداء تيشرت الزمالك لانه افضل جناح شمال في افريقيا متفوق على اي حد في المركز دا بمسافة كبيرة
اتمنى نعيد ترتيب اوراقنا ونعرف ان الاولوية للاعيبة اللي زي بن شرقي عن اي تجارب باسعار اقل هتكلف النادي دولارات بدون مقابل خاصة اننا عارفين وواثقين في امكانيات بن شرقي ومش محتاجين لسه نجربه.
تعليقات
إرسال تعليق